La 31an de aŭgusto 2008 okazis en la urbo Taubaté/SP, la 73a Renkonto de Esperanto en la Paraiba Valo. La unutaga evento okazis en la Domo de Advokatoj kaj ĝin organizis la anoj de Taubaté Esperanto-Klubo, kiu pasintjare memorfestis sian kvindekjariĝon. Ĉirkaŭ trideko da esperantistoj ĉeestis tri prelegojn prezentitajn de d-ro Maurício Monken pri "Esperanto kaj Religio"; de la studento pri fizioterapio, Alexandre Prado, pri "Lumbodoloro" kaj de la ŝtata instruisto, Carlos Pettinati, pri "Machado de Assis". Krom la prelegoj, la ĉeestantoj povis pli aktive partopreni kaj en la debato pri la temo "Kial esperantistoj preskaŭ ne aĉetas esperantajn librojn?" kaj en la tradicia programero "Guto da Gramatiko" ĉi-foje prezentita de Paulo S. Viana, kiu regalis la ĉeestantojn per gaja atentigo pri la temo "Interpunkcio estas grava!".

Dum la tuta evento okazis deĵorado ĉe la budo de la Sekcio, kiu portis i.a. la lernilojn Oportuna Poŝvortaro - Esperanta-portugala, Komputeko - prikomputila terminaro, Poŝamiko - memorilo por komencantoj, kaj Ilustrita Oficiala Radikaro Esperanta.

La sekva renkonto okazos en Rio, en urbo kaj dato baldaŭ diskonigotaj.